top of page

ЕКСТРЕМНО ЗГОЛЕМУВАЊЕ НА БРОЈОТ НА ДЕЦА ШТО БАРААТ МЕДИЦИНСКИ ТРЕТМАНИ ЗА ПОТВРДУВАЊЕ НА РОДОТ


На фотографијата: Сани Брајант, 8 годишно момче, кое на почетокот на годината стана центар на внимание, откако закононосителите од Тексас ги прогласија за нелегални хормонските третмани, што Сани планира да ги преземе откако ќе стане адолесцент.




Во последните години Соединетите Американски Држави забележаа експлозија на бројот на деца кои се идентификуваат како пол различен од оној што им е утврден при раѓање. Илјадници семејства се наоѓаат исправени пред носење на сериозни одлуки поврзани со новото поле на медицината, додека го бараат она што се нарекува грижа за потврдување на родот на нивните деца.


Во 2021 година, околу 42.000 деца и тинејџери ширум Обединетите држави беа дијагностицирани со родова дисфорија, речиси тројно повеќе од 2017 година, според податоците на Комодо Хелт - технолошка компанија, кои беа собрани за Ројтерс. Родовата дисфорија е дефинирана како вознемиреност предизвикана од несовпаѓање помеѓу родовиот идентитет на една личност и полот што му е доделен при раѓање.


Генерално, анализата покажа дека најмалку 121.882 деца на возраст од 6 до 17 години биле дијагностицирани со родова дисфорија од 2017 до 2021 година. Ројтерс откри слични трендови кога побара податоци на државно ниво за дијагнозите на децата што се под Medicaid, јавната програма за осигурување на семејства со пониски приходи.


Грижата што го потврдува родот опфаќа спектар на интервенции. Тоа може да биде усвојување на преферираното име и заменки на детето и да му се дозволи да се облекува во склад со својот родов идентитет, што се нарекува социјална транзиција.


Може да вклучи терапија или други форми на психолошки третмани. И, од околу почетокот на адолесценцијата, може да вклучи медицински интервенции, како што се блокатори на пубертетот, хормони и, во некои случаи, операции. Со сето тоа, целта е да се поддржи и афирмира родовиот идентитет на детето.


Овие медицински третмани не започнуваат до почетокот на пубертетот, обично околу 10-тата или 11-тата година.


Но, семејствата кои тргнуваат по тој медицинскиот пат, газат на несигурно тло, каде што науката допрва треба да ја достигне праксата. Додека бројот на родови клиники, кои лекуваат деца во САД, порасна од нула на повеќе од 100 во изминатите 15 години - а листите на чекање се долги – не постојат силни докази за ефикасноста на тој третман и за можните долгорочни последици.


Блокаторите на пубертетот и половите хормони не се одобрени за родова грижа за децата од страна на американската Администрација за храна и лекови (ФДА). Ниту една клиничка студија не ја утврдила нивната безбедност за таквата употреба вон она за што се назначени. Долгорочните ефекти на лековите врз плодноста и сексуалната функција остануваат нејасни.


Во 2016 година, ФДА им нареди на производителите на блокатори на пубертетот да додадат предупредување на етикетата на медикаментите за можни психијатриски проблеми, откако агенцијата добила неколку пријави за самоубиствени мисли кај децата кои ги земале.


Понатаму, нема студии од големи размери кои ги следеле луѓето кои добивале родова медицинска нега како деца, за да се утврди колку од нив останале задоволни од нивниот третман додека созревале и колку на крајот зажалиле што транзитирале. Истиот недостаток на јасност важи и за спорното прашање околу детранзицијата, кога пациентот го запира или го менува процесот на транзиција.


Националниот институт за здравје, кој е американска владина агенција одговорна за медицинските и јавно-здравствени истражувања, изјави за Ројтерс дека „доказите се ограничени за тоа дали овие третмани претставуваат краткорочни или долгорочни здравствени ризици за трансродовите и другите адолесценти со различни родови“.


Англискиот здравствен систем финансираше сеопфатна студија за испитување на менталното здравје и другите резултати кај околу 400 трансродови млади третирани во четири американски детски болници. Сепак, долгорочните резултати се години далеку од нас и можеби нема да се осврнат на загрижувачките прашања околу плодноста или когнитивниот развој, објавуваат Ројтерс и Дејли Мејл.

127 views0 comments
bottom of page